نیگار خیاوی

نیگار خیاوی

حیاتی:

گونئی آذربایجان مودئرن شعر تمثیل‌ چیلریندن بیری اولا‌راق نیگار خییاوی آدییلا تانینان طییبه پوراکبر خییاوی، گونش ایلی 10 آذر 1339 (1960)`دا گونوموزده "مئشگین شهر" آدلانان "خیوو" شهرینده اورتا حاللی و بئش باجی- قارداشدان اولوشان بیر عایله‌ ده دونیایا گؤز آچدی.

رحمت ‌لیک آتاسی "مؤحسون" فرمانداری کارمندی ایدی. آناسی نجیبه ایسه ائو خانیمی‌ دیر. او ایلک، اورتا و لیسه یی مئشگین ین رازی، شرف، پروین اعتصامی و رستاخیز اوخول‌لاریندا اوخودو. 1984`ده تئهرانین تربیت تئکنئسیین اینستوتوندا میکروبیولوژی بؤلومونو قازاندی، آما بیر سیرا ندنلر اوزوندن تحصیلینی یاریمچیق بوراخدی. بو آرادا بیر سوره رادیولوژی تئکنئسینی وظیفه‌ سینده چالیشدی. 1997`ده لاهیجان شهری ‌نین آزاد اونیوئرسیته ‌سینده اینگیلیز دیلی موترجیم ‌لییی بؤلومونه گیردی. یئنه بونو دا یاریمچیق بوراخدی. 1998`ده تبریز آزاد اونیوئرسیته سی سوسیال بیلیم‌ لر بؤلومونو قازاندی و 2002`ده بو بؤلومدن لیسانس دیپلوماسی آلدی. 2006`دا قوزئی آذربایجانین خزر اونیوئرسیته سینده هومانیتار و سوسیال علم ‌لر فاکولته‌ سی آذربایجان دیلی (تورکجه‌سی) و ادبیاتی اوزره یوکسک لیسانس درسلرینی کئچیردی و 2008`ده "حبیب ساهیرین حیاتی و اثرلری اوزرینه آراشدیرما" آدلی تئزینی پروفسور دؤکتور هاملئت عیسی خانلی نین علمی رهبرلییی ایله مدافعه ائتدی. ایندی ایسه عینی بؤلومده دوکتورا اوخوماغا حاضرلانیر.

ن. خییاوی، شعر ایله بیرلیکده حکایه یازارلیغی و فارسجا‌دان آذربایجان تورکجه‌ سینه چئویردییی ترجومه ‌لری ایله ده تانینماقدا‌دیر. اونون ایندییه دک ایران ایچینده و ایران‌ دان ائشیکده چئشیتلی ژورنال، درگی و سیته ‌لرده بیر چوخ مقاله ‌لری یاییملانمیش‌دیر. یازدیغی حکایه‌ لرینی یاخین گله‌ جکده نشر ائتمه یی دوشونور.

نیگار خانیم 1386دا، سونای آذربایجان حکایه فئستیوا‌لی، 1387ده قیزیل آلما شعر فئستیوا‌لی ژوری هئیتی ‌نین عضولریندن اولموشدور. 2007`ده ایستوکهولمدا دونیا قادین‌لار گونو موناسیبتیله کئچیریلن کونفرانسا قاتیلمیش دیر.

نیگار خانیم 2006- جی ایلدن آذربایجان یازیچی‌لار بیرلییی نین عضوودور. ایندی‌لیکده تبریزده یاشاییر. چالیشماییر. ائولی و ائلدار ایله آرش آدیندا ایکی اوغول آناسی‌ دیر.

.

.

اثرلری:

منیم شعریم (شعر توپلوسو، 1995-تئهران / اندیشه نو نشریاتی)

کؤلگه‌ ده کی سس (شعر توپلوسو، 1996-تئهران / اندیشه نو نشریاتی)

بیل عزا‌لی‌لاری (چئویری، 2003-تبریز / اختر نشریاتی)

توپ (چئویری، 2003- / تبریز)

شهرین جیریغیندا نیگار (شعر توپلوسو، 2005- / تبریز)

الیمده اللی بارماق (شعر توپلوسو، 2007-یاشماق سیرا کیتاب‌لاری / تبریز)

.