غلامحسين ساعدی

Saidi

غلامحسين ساعدی

غلامحسين ساعدي 1314 - اونجو ایلده، دی آیینین 24 - اونده تبریزده دونیایا گلدی. داها 17 یاشیندا ایکن آذربایجان دئموکرات فیرقه سینه قوشولدو. بو ایللرده، فریاد، صعود، دانش آموز و جوانان آذربایجان درگی لرینین یاییملانما مسئولییتی نی داشییاراق بو درگی لرده مقاله و ناغیللار یاییملادی. 1334 - ده تبریزین طب فاکولته سینده تحصیله باشلادیقدان سونرا بوللوجا نمایشنامه لر و ناغیللار یازدی. او ائله جه ده تبریزده اؤیره نجی حرکت لرینه قاتیلاراق صمد بهرنگی کیمی اینسانلارلا دوستلاشما ایمکانینی قازاندی. داها سونرالار اونون یازدیغی نمایشنامه لر گیزلی شکیلده تهراندا ایجرا اولوردو. ساعدی 1343 - ده آذربایجانا سفریندن سونرا ” خیوو یا مشگین شهر” آدلی بیر اثر اورتایا قویدو. باشقا اثرلریندن اهل هوا، دندیل (ناغیل) پنج نمایشنامه از انقلاب مشروطیت، بامها و زیر بامها(نمایشنامه)، از پا نیفتاده ها(نمایشنامه)، گاو(نمایشنامه)، آی باکلاه، آی بی کلاه(نمایشنامه)، توپ(رمان)، و… آد آپارماق اولار. ساعدی ائله جه ده ایللر بویو ساواک مامورلاری طرفیندن قیزیل قالا و اوین زیندانلارینا حبس ائدیلمیشدیر. او 1360 - اینجی ایلده پاریس - ه گئدیب اوردا الفبا درگیسی نی چیخارتمیشدی. همن ایللرده اوتللو در سرزمین عجایب، پرده داران آیینه افروز، رونئسانس، و دکتر اکبر کیمی اثرلرینی اولوشدورموشدور. ساعدی، داریوش مهرجویی - نین یاردیمی ایله مولوس کورپوس فیلمنامه سینی یازمیش دیر. اونون بیر چوخ یازیلاری هله بیتمه دن، آذر آیینین ایکینجی گونو 1364 - ده دونیاسینی ده ییشیب پاریس - ین پرلاشز مزارلیغینا تاپشیریلدی.
.
خاطیرلاتماق لازیمدیر کی، ساعدی قوردلار آدلی نمایشنامه سینی آذربایجان تورکجه سینده یازمیش دیر. بو کیتاب بو گونه قده ر هله یاییملانماییب.
غلامحسين ساعدي - نین توپ و بیل عزالیلاری رمانینی خانیم نیگار خیاوی آذربایجان تورکجه سینه چئوریب.
.
.
تورکجه اثرلری:
1- قوردلار(نمایشنامه)

.
.
تورکجه یه چئوریلمیش اثرلری:
1- بیل عزالیلاری
2- توپ
.
.
بایقوش-داکی تورکجه اثرلرینی بوردان اوخویا بیلرسیز:
1- سونسوز سفر، ناغیل
2- ریشه در خویش، مقاله
3- سعادت نامه، ناغیل